وانا صـــــــــــــــــــــغير

وانا صـــــــــــــــــــــغير ....


(*)(*)(*)(*)*(*)

))))((((



وانا صغير .. كنت شقى

كنت ولد زى كل الولاد ..

بس رجليا شايلانى

كنت بأجرى والعب واتنطط

كنت بأحلم ببكره وياريته جانى

صغير .. وحلمى أد كفى صغير

اخد مصروفى .. !!

بدل مااشترى حلاوه

اشترى به طياره

كنت بأحلم اكون طيار

لابس البدله ام الزراير

اشد الخيط واجرى اجرى

عايز اطير مع الطياره من الارض

وأشب وانط .. لكن ماطلعش لى جناح

اسرح وانظر لفوق للسحاب والنجوم

واقول امتى اوصل لحد الغمام

هههه شغل عيال صغيرين !!

(())

وفى الليالى نقعد حوالين الجده

عيال صغيرين تشدنا حكاوى الجده

تحكى لنا عن الاميره الجميله

وحبيبها الشاطر حسن ..

واسرح وانظر اليها واقول ياجده

انا الشاطر حسن فين الاميره

ولما تحكى عن امنا الغوله

كنت البد فى حضنها خواف

تقول ايه .. شغل عيال صغيرين

(())

اخرج ماسك ايد امى

اصلها قالت لى تعال عشان تشوف البحر

رحت معاها .. لبست القميص والشورت الجديد

فرحان ح اشوف المراكب والمراكبيه ولون البحر

كنت على البحر .. انظر للميه واتخيل

ياترى ايه بعد الميه السما ولا الليل

اسرح واقول انا عايز اكون سمكه تسبح فى الميه

عايز اوصل اخر البحر .. واسألها يامه عايز اعوم فى الميه

تضحك .. وتقولى بكره لما تكبر .. تبقى ربان سفينه

تعدى بحار وبحار .. وتشق عباب الميه

تسافر بلاد بعيده .. وترجع لى بهدايا جميله

واسمع واسرح وانظر للميه

تقول ايه .. شغل عيال صغيرين

(())

وتمر السنين بسرعه وسريعه

تأخدنى الافراح والاحزان تلازمنى

وخط الزمان خطوطه على وجهى وايديا

وشاب الشعر واتنحل ياولداه فين الصبيه

ياما حلمت بست الحسن الصبيه

لا قابلتها ولا فى يوم كحلت عينيا

هو انا ياناس .. مش مكتوب لى الهنيه

اقاسى .. وابكى واكفكف دموع عينيا

(())

واقعد جنب الشباك معايا صوره قديمه

دابت اصلها من زمان صور بالميه

الملامح بهتت .. فينك ياصبيه

كنت فيها صغير .. مليان شقاوه وحنيه

كانوا يدللونى .. ويقولوا بكره يبقى حاجه تانيه

اضحك دلوقتى على كلامهم ..

واقول اللى انكتب له حزن مالوش هنيه

ههههه تقول ايه .. شغل عيال صغيرين

((()))

خلص كلامى وراحت ذكرياتى

اصل انا .. كنت بأحكى لك عنى

بس بأتخيل كلامى وانا فى سن الرذيه

الستين ياصاحبى جايه جايه

حوش لها ذكرياتك .. وصورك

فى ولاد ح تقعد جنبك

ح تحكى لها مغامراتك

بس اوع تكون عن الصبيه

لاحسن الواد قاعد قدامك بيحلم

خليه عايش فى الحقيقه

وخلى فى منامه الاحلام

تقول ايه ... شغل عواجيز

الشاعر احمد على‎'