وعجبى!!!!!!!!!!!!!!!!!!!!!!!!!!!

يا باب يا مقفول ... إمتي الدخول صبرت ياما و اللي يصبر ينول دقيت سنين ... و الرد يرجع لي : مين ؟لو كنت عارف مين أنا كنت أقول.

أنا شاب لكن عمري ألف عام وحيد لكن بين ضلوعي زحام خايف و لكن خوفي مني أنا أخرس و لكن قلبي مليان كلام.

و الكون ده كيف موجود من غير حدود و فيه عقارب ليه و تعابين ودود عالم مجرب فات و قال سلامات ده ياما فيه سؤالات من غير ردود.

ياما صادفت صحاب و ما صاحبتهمش و كاسات خمور و شراب و ما شربتهمش أندم علي الفرص اللي انا سبتهم و الا علي الفرص اللي ما سبتهمش

مركبنا تايهه لسه مش لاقيه بر آه م الطوفان وآهين يا بر الأمان إزاي تبان و الدنيا غرقانه شر

عجبتني كلمة من كلام الورق النور شرق من بين حروفها و برق حبيت أشيلها ف قلبي .. قالت حرام ده أنا كل قلب دخلت فيه اتحرق

سهير ليالي و ياما لفيت و طفت و ف ليه راجع في الضلام قمت شفت الخوف ... كأنه كلب سد الطريق و كنت عاوز أقتله .. بس خفت.

انا كل يوم أسمع ........ فلان عذبوه أسرح في بغداد و الجزاير واتوه ما أعجبش م اللي يطيق بجسمه العذاب و اعجب من اللي يطيق يعذب أخوه.

في يوم صحيت شاعر براحة و صفا الهم زال والحزن راح و اختفي خدني العجب و سألت روحي سؤال أنا مت ؟ و لا وصلت للفلسفة.

يا نجم .. نورك ليه كده بيرتجف ؟ هو انت قنديل زيت ؟ أو تختلف - أنا نجم عالي .. بس عالي قوي و كل ما انظر تحت اخاف انحدف.

كروان جريح مضروب شعاع م القمر سقط من السموات فؤاده انكســـــر جريت عليه قطه علشان تبلعــــه أتاريه خيال شعراء و مالهـــــوش أثر.

تسلم يا غصن الخوخ يا عود الحطــب بييجي الربيع .. تطلـــع زهورك عجب و انا ليه بيمضـــي ربيع وييجي ربيع و لسه برضك قلـــبي حتة خشب.

يا مشرط الجراح أمانة علـــيك و انت ف حشايا تبص من حواليــك فيه نقطة سوده في قلبي بدأت تبان شيلها كمان .. و الفضل يرجع إليك.

أنا كنت شئ و صبحت شئ ثم شــئ شوف ربنا .. قادرعلي كل شـــئ هز الشجر شواشيه ووشوشني قال : لابد ما يموت شئ عشان يحيا شئ .

سمعت نقطة ميه جوه المحيــــط بتقول لنقطه ما تنزليش في الغويط أخاف عليكي م الغرق .. قلـــــت أنا ده اللي يخاف م الوعد يبقي عبيط .

قش مفروش بريش تقوي عليه الريح .. يصبح ما فيش عجبي عليك حواليك مخالب كـــــبار و ما لكش غير منقار و قادر تعيش.

دخل الشتا وقفل البيبان ع البـــيوت وجعل شعاع الشمس خيط عنكبوت وحاجات كتير بتموت في ليل الشــتا لكن حاجات أكتر بترفض تمــوت.

فارس وحيد جوه الدروع الحديد رفرف عليه عصفور وقال له نشيد منين .. منين.. و لفين لفين يا جدع قال من بعيد و لسه رايح بعيد .

بحر الحياه مليان بغرقي الحياه صرخت خش الموج في حلقي ملاه قارب نجاه .. صرخت قالوا مفيش غير بس هو الحب قارب نجاه.

إنشد يا قلبي غنوتك للجمـــال و ارقص في صدري من اليمين للشمال ما هوش بعيد تفضل لبكره سعيــــد ده كل يوم فيه الف الف احتمـــال.

ليه يا حبيبتي ما بيننا دايما سفر ده البعد ذنب كبير لا يغتفر ليه يا حبيبتي ما بيننا دايما بحور أعدي بحر ألاقي غيره اتحفر

إيديا في جيوبي وقلبي طـــرب سارح في غربة بس مش مغترب و حدي لكين ونسان و ماشي كده وبابتعد ما اعرف .. أو باقـــترب

ياللي عرفت الحب يوم و انطـــوي حسك تقال مشتاق لنبع الهــوي حسك تقول مشتاق لنبع الغـــرام ده الحب .. مين داق منه قطره...ارتوي

العشب طاطا للنسايم و نــخ أخضر طري مالهش في الحســن أخ عصفور عبيط انا .. غاوي بهجه و غنا ح انزل هنا.. و انشا لله يهبرني فـــــخ.

لو فيه سلام في الأرض وطمان و أمن لو كان مفيش و لا فقر و لا خوف جبن لو يملك الانسان مصير كل شــئ انا كنت اجيب للدنيا ميت ألف ابـن .

غمست سنك في السواد يا قلـــم عشان ما تكتب شعر يقطر ألــم مالك جرالك إيه يا مجنون ... و ليــــــــه رسمت ورده وبيت و قلب و علـــم.

فتحت شباكي لشمس الصبـاح ما دخلش منه غيــــر عويل الريـاح وفتحت قلبي عشان ابوح بالألــم ما خرجش منه غير محبه و سمــاح.

يأسك و صبرك بين إيديك و انت حر تيأس ما تيأس الحياه راح تـمر أنا دقت مندا ومندا عجبي لقيــت الصبر مر و برضك اليـأس مـــر.

حاسب من الاحزان و حاسـب لها حاسب علي رقابيك من حبلـها راح تنتهي و لابد راح تنتهــي مش انتهت أحزان من قبلهــا؟

غمض عينيك و ارقص بخفة و دلع الدنيا هي الشابة و انت الـجدع تشوف رشاقة خطوتك تعبـدك لكن انت لو بصيت لرجليك ....تـقع.

كام اشتغلت يا نيل في نحت الصخور مليون بئونه و الف مليون ها تور يا نيل أنا ابن حلال و من خلفتــك و ليه صعيبه علي بس الأمــور.

خوض معركتها زي جدك ما خاض صالب و قالب شفتك بامتـعاض هي كده...ما تنولش منها الأمـل غير بعض صد ورد ووجاع مخاض.

لا تجبر الانسان و لا تخــيره يكفيه ما فيه من عقل بيحيـره اللي النهارده بيطلبه و يشتهـيه هو اللي بكره ح يشتهي يغيــره.

يا عندليب ما تخافش من غنوتك قول شكوتك و احكي علي بلوتك الغنوه مش ح تموتك إنمـــا كتم الغنا هو اللي ح يموتــك.

عيني رأت مولود علي كتف أمــه يصرخ تهنن فيه يصرخ تضــمه يصرخ تقول يا بني ما تنطق كـــــــلام / ده اللي ما يتكلمش يكتر همــــه.

اوقات أفوق و يحل عني غبـــايا واشعر كأني فهمت كل الخبايـــا و افتح شفايفي علشـان اقول الدرر ما أقولش غير حبة غزل في الصبايــا.

الضحك قال يا سم ع التكشيـــر امشير و طوبه وانا ربيعي بشيـر مطرح ما باظهر بانتصر ع العدم انشالله أكون رسماية بالطباشيــر.

عبثا باقول واقرا في سورة عبس ماتلومش حد إن ابتسم أو عبس فيه ناس تقول الهزل يطلع جــــد و ناس تقول الجد يطلع عبـــــث.